Maddi Etxeberria Otaegi

Maddi Etxeberria Otaegi Andoainen jaio zen, 1998an. Txiki-txikitatik izan du lotura oso estua literaturarekin. Gurasoek gauero-gauero irakurtzen zizkioten ipuinak, geroago, bere kasa irakurritako liburuxkekin ordezkatu zituen; urteak aurrera joan ahala, liburuak loditzen joan ziren. Idaztea ere, txiki-txikitatik egin duen zerbait da; hasieran ipuinak idazten zituen, baina koxkortu ahala, bere barne-korapiloak askatzeko baliabide bihurtu zitzaion literatura.

“Urruzunotarrak gehituz” edota “Martin Ugalde” bezalako sariketak irabazi ditu Maddik, baina askozaz orri gehiago dira jendeak irakurritakoak baino, bere etxeko apaletan pilatu dituenak. Gaur egun, Giza Nutrizioa eta Dietetika ikasten ari da Gasteizen, eta Zein usain dute oroitzapenek? da bere lehen eleberria.